Anthropic-ის შიდა კვლევა აჩვენებს, როგორ იცვლება სამუშაო გარემო, როდესაც თანამშრომლები ყოველდღიურ დავალებებს ხელოვნური ინტელექტის აგენტებს აბარებენ.
Claude-ის შემქმნელმა კომპანიამ Anthropic-მა 16 ოქტომბერს გამოაქვეყნა კვლევა საკუთარი თანამშრომლების მუშაობის შესახებ. შედეგებში ერთი პარადოქსი გამოიკვეთა: ავტომატიზაციის ზრდის პარალელურად, ადამიანებს შეხვედრებზე მეტი დრო ეხარჯებათ.
კალენდრების მონაცემებით, შეხვედრებზე დახარჯული დროის მედიანური მაჩვენებელი წინა წელთან შედარებით 20%-ით გაიზარდა. ტექნიკურ თანამშრომლებში, რომლებსაც მენეჯერული პოზიცია არ უკავიათ, ზრდა 16% იყო. ავტორები ამას ნაწილობრივ კომპანიის გაფართოებას, ნაწილობრივ კი ადამიანებს შორის კოორდინაციის საჭიროებას უკავშირებენ.
აგვისტოსთვის თანამშრომლების მიერ მართული AI აგენტების მუშაობის ჯამური ხანგრძლივობა ადამიანების სამუშაო საათებს ექვსჯერ აღემატებოდა. თუმცა ეს ექვსჯერ მეტ პროდუქტიულობას არ ნიშნავს: შედარებულია აგენტების მუშაობის დრო და თანამშრომლებისთვის ნავარაუდევი 40-საათიანი სამუშაო კვირა.
პარალელურად, დამწყები სპეციალისტების წილი ახალ ტექნიკურ თანამშრომლებს შორის 27%-დან 9%-მდე შემცირდა. ეს არ ნიშნავს, რომ კომპანიამ ტექნიკური კადრების დაქირავება შეწყვიტა — მათი რაოდენობა აბსოლუტურ მაჩვენებელში კვლავ იზრდებოდა.
კვლევაში აღწერილი ცვლილება სამუშაოს შინაარსსაც ეხება: თანამშრომლები მეტ დროს უთმობენ აგენტების მართვას, შედეგების შემოწმებასა და გადაწყვეტილებების მიღებას. ავტომატიზებული დავალებების ფონზე ადამიანის ყურადღება სულ უფრო შეზღუდულ რესურსად იქცევა.
ეს ერთი კომპანიის მიერ საკუთარ საქმიანობაზე ჩატარებული კვლევაა და მის შედეგებს მთელ შრომის ბაზარზე პირდაპირ ვერ განვაზოგადებთ. თუმცა ის მნიშვნელოვან კითხვას აჩენს: თუ საწყისი დონის ამოცანებს AI შეასრულებს, სად და როგორ შეიძენენ დამწყებები გამოცდილებას?